എന്നേം സിനിമേലെടുത്തു

ബഹു  പ്രസിഡന്റ്  ശുധീരൻ  സാറേ,

എന്നേം ഡി.സി.സി. ലെടുത്തു. അല്ലേ.   ഇന്നലെ മനോരമ പത്രം നോക്കിയപ്പയാണ്  സാറേ  കോയിക്കോട് ഡി.ശി.ശി. ലിസ്റ്റുമ്മേല് ഞമ്മടെ പേരും കണ്ടത്. തൊണ്ണൂറ്റാറ് പേരുടെ ലിസ്റ്റില് ഞമ്മളാ ശെക്രട്ടറി എന്നാ എഴുതിയിരിക്കുന്നത്. 

 സാറേ ഞമ്മള് കോണ്‍ഗ്രസ്സ് ഒന്നുമല്ല. കോയിക്കോട് ഡി.ശി.ശി   അപ്പീസിന്റെ ആടെ  ചായക്കട നടത്തുവാ ഞമ്മള്. കയിഞ്ഞ മാസം ചായേം വടേം ദോശേം ഒക്കെ കയിച്ച ബഹയില് ഡി.ശി.ശി   അപ്പീസില് വരുന്ന നിങ്ങടെ കോണ്‍ഗ്രസ്സുകാര് ഞമ്മക്ക് കുറെ പൈശ തരാനുണ്ട്. ( അവർക്ക് കടയില് പറ്റാ)  അവരുടെയൊക്കെ പേരെയുതി ഓര് തരാനുള്ള പൈശേം എയുതി വലിയ ഒരു കടലാശ് , 96 പേരുടെ  പേര് , ഏറ്റവും  അടിയില് ഞമ്മടെ പേര് കാതര്, എന്ന് എഴുതി ഒപ്പ് ഒരു ശൂ വരച്ച് ഞമ്മള്  ഡി.ശി.ശി. അപ്പീശി കൊടുത്തു. ആപ്പീശിലെ തൂപ്പ് കാരി  ജാനു ചായ കുടിക്കാൻ വന്നപ്പം ഓളുടെ കയ്യിലാ കൊടുത്തത്. ചോദിച്ചപ്പം ആടെ  ആരുമില്ലാ എല്ലാരും അങ്ങ് തിരുവനന്തപുരത്ത് പോയിരിക്കുവാ എന്ന് ഓള്  പറഞ്ഞു.  ഓള് തരാനുള്ള പൈശയും ആ കടലാസ്സില് എഴുതിയിട്ടുണ്ട്.  ആ പഹയത്തി അതെന്തുവാ എന്ന് നോക്കാതെ ആ ലിസ്റ്റ്  നേരെ  കെ.പി.സി.സി. ഓഫീസില് നിങ്ങക്ക് അയച്ചു തന്നു. നിങ്ങള് അത് കോയിക്കോട് ഡി.ശി.ശി ലിസ്റ്റ് ആക്കി. അങ്ങനാ മാഷെ ഞമ്മള് കോയിക്കോട് ഡി.ശി.ശിയില് ആയത്. ജാനൂന്റെ പേരും ലിസ്റ്റിൽ ഒണ്ട്. ഞമ്മള്  കാതര് എയുതിയിട്ട് ശൂ എന്ന് നീട്ടിയെയുതി ഒപ്പിട്ടത്  നിങ്ങള്  ശെക്രട്ടറി എന്ന് വായിച്ചാണ് ഞമ്മള് അതായത്.

 കയിഞ്ഞ 25 കൊല്ലമായി ഞമ്മള് ആടെ ചായക്കട നടത്തുന്നു. എത്ര കോണ്‍ഗ്രസ്സ്കാരെ ഞമ്മള് കണ്ടിരിക്കുന്നു. എത്ര കളികള് ഞമ്മള് കണ്ടു. എത്ര പേരുക്ക് സീറ്റ് കൊടുക്കാതിരുന്നു. എത്ര പേരെ വെട്ടി മാറ്റി. എത്ര പേരെ കുത്തി തിരുകി. എന്തോരം ഗ്രൂപ്പ്  കളിയാ ഞമ്മള് കണ്ടത്. പിന്നെ  ചെറിയാൻ ഫിലിപ്പ് സാര്  പറഞ്ഞ മറ്റെക്കാര്യവും.ഞമ്മക്ക് എല്ലാം അറിയാം സാറേ. നമ്മക്ക് നല്ല പരിചയം ഒണ്ട്. അത് കൊണ്ട് ഞമ്മള് ഇപ്പോഴത്തെ ഡി.ശി.ശി. നന്നായി നടത്തും ഭായീ. 

നന്ദി 
ജയ് ഹിന്ദ്‌, ജയ്‌ കോണ്‍ഗ്രസ്, ജയ്‌ സോണിയ ഗാന്ധി, ജയ്‌ രാഹുൽ ഗാന്ധി . പിന്നെ ജയ്‌ സുധീരൻ, ജയ്‌ ഉമ്മൻ ചാണ്ടി ജയ്‌ രമേശ്‌  ചെന്നിത്തല.

എന്ന്
ചായക്കട കാതർ  ഭായ് 

(ശ്രീജിത്ത്‌ എന്ന സുഹൃത്ത്‌ വാട്സാപ്പിൽ അയച്ചു തന്ന  സാധനം ഒന്ന് മിനുക്കി എടുത്തതാണ്)