സർഗ ഭാരതി മാസികയുടെ ഉദ്ഘാടനം 

പ്രതിരോധ മന്ത്രി

അതാണ്‌ ആണത്വം. സൈനിക കേന്ദ്രങ്ങളെ ആക്രമിച്ച് 18  സൈനികരെ വധിച്ച നാഗ-മണിപ്പുരി തീവ്രവാദികളെ 72 മണിയ്ക്കൂറിനകം തിരിച്ചു ആക്രമിയ്ക്കുകയും അവരുടെ ക്യാമ്പ് തകർക്കുകയും അൻപതിലേറെ തീവ്ര വാദികളെ വക വരുത്തുകയും ചെയ്തു. പുലിയുടെ മടയിൽ ചെന്ന് അതിനെ ആക്രമിയ്ക്കുന്ന രീതി. അത് മോദിയുടെ വിജയം തന്നെ.

നമ്മുടേത്‌, അതായത് മലയാളിയുടെത്, എന്ന് പറഞ്ഞും ഒരു പ്രതിരോധ മന്ത്രി ഭാരതത്തിൽ ഉണ്ടായിരുന്നല്ലോ. എ.കെ.ആന്റണി. അദ്ദേഹത്തിൻറെ പേരിൽ എ .കെ. ഉണ്ടെന്ന് അറിഞ്ഞിരുന്നുവെങ്കിൽ കലാഷ്നികോവ്  എ.കെ. 47 ന്‌
ആ പേരിടില്ലായിരുന്നു. അത്രയ്ക്ക് തണുപ്പൻ. മന്തൻ രാജാവിന് മൈഗുണൻ മന്ത്രി എന്ന് പറഞ്ഞത് പോലെ മൗനി പ്രധാന മന്ത്രിയ്ക്ക് വിക്കൻ മന്ത്രി. മൻ മോഹൻ സിംഗ് ഒന്നും മിണ്ടുകില്ല. ആന്റണി ആകട്ടെ " ങ്ങ" "ഞ്ഞ" " ണ" എന്ന രണ്ടു മൂന്നു വാക്കുകൾ. ആ ഇരിപ്പും പ്രൌഡിയും കണ്ടാൽ

എന്തെങ്കിലും കുഴപ്പമുണ്ട് എന്ന് തോന്നുമോ? ഇല്ല അതാണ്‌ അദ്ദേഹത്തിന്റെ വിജയം. ഇങ്ങിനെ ഇരുന്നു കൊള്ളും. ആർക്കും ശല്യം ഒന്നുമില്ലാതെ. കോണ്‍ഗ്രസ്സ് നേതൃത്വത്തിനും അത് തന്നെ ആവശ്യം. ഒന്നും മിണ്ടില്ലല്ലോ. ഭാരതത്തിൽ നടന്ന എല്ലാ ആയുധം വാങ്ങലിലും കോടികളുടെ കോഴ ഉണ്ടെന്ന് ഏവർക്കും അറിയാം     ബോഫോര്സിൽ രാജീവ് ഗാന്ധി ചെയ്ത പരിപാടി. ആന്റണി സംശുദ്ധൻ. കാര്യം എളുപ്പമായല്ലോ. പാർട്ടിയ്ക്ക് കാശ്. അതാണ്‌ ആശാനെ അവിടെ ഇരുത്തിയത്. 

ആ കാലഘട്ടത്തിൽ ആന്റണി പ്രത്യേകിച്ച് ഒന്നും ചെയ്തില്ല. ഇപ്പോൾ കണ്ടല്ലോ. അതാണ്‌ വ്യത്യാസം.  അദ്ദേഹത്തെ ഇടയ്ക്കിടെ അരുവിക്കരയിലും മറ്റും കാണാം. ഉണ്ടിരുന്ന ആർക്കോ ഉൾവിളി തോന്നി അന്ന് പറഞ്ഞത് പോലെ ആന്റണി ഒരു ദിവസം  പറഞ്ഞു കേരളത്തിൽ നിറയെ അഴിമതി ആണെന്ന്. ആന്റണിയെ ചീത്ത വിളിയ്ക്കാതെ കൊണ്ട് നടക്കുന്നു എന്ന് വച്ച് അത്രയൊന്നും കോണ്‍ഗ്രസ്സുകാർ സഹിയ്ക്കില്ല. പ്രത്യേകിച്ചും, ചാണ്ടി,  മാണി, ബാബു,ചെന്നിത്തല,ശിവകുമാർ തുടങ്ങിയ മന്ത്രിമാർ കോഴ ആരോപണത്തിൽ നിൽക്കുമ്പോൾ.  അവർ പറഞ്ഞു: അത് പൊതുവെ പറഞ്ഞതാണ് മന്ത്രിമാരെ ഉദ്ദേശിച്ചല്ല.  എല്ലാ അഴിമതിക്കാരും അതേറ്റു പറഞ്ഞു. ഞങ്ങളെ ഉദ്ദേശിച്ചല്ല. എന്നിട്ട് ചാണ്ടി ആന്റണിയെ വിളിച്ചു പറഞ്ഞു. "ഒരു പുനരധിവാസ പദ്ധതി പോലെയാണ് ( Rehabilitation) നിങ്ങളെ കൊണ്ട് നടക്കുന്നത്. അത് കൊണ്ട് അഴിമതിയെ പറ്റി മാത്രം പറയരുത്". ആന്റണി ഉടൻ തന്റെ വാക്കുകൾ വിഴുങ്ങി. എന്നിട്ട്  തിരുത്തി പറഞ്ഞു. " ഞാൻ പ്രത്യേകിച്ച് ആരെയും ഉദ്ദേശിച്ചു പറഞ്ഞതല്ല" . അതാണ്‌ ആന്റണി.

ഏതായാലും മറ്റു പ്രതിരോധ മന്ത്രിമാരെ നോക്കി ഇങ്ങിനെ നടക്കട്ടെ അദ്ദേഹം. 

'ജെട്ടി കേസ്'

മാണിയുടെ കോഴക്കേസ് വന്നതോടു കൂടി ചാനലുകളിൽ അടി പിടി കോലാഹലം ആണ്. തന്തയ്ക്ക് വിളി വരെ വന്നു.  പിന്നെ വിഴുപ്പ് അലക്ക്. അലക്കി അലക്കി മലീമസമായ അടി വസ്ത്രങ്ങൾ വരെ പരസ്യമായി അലക്കുന്നു. ഏറ്റവും അവസാനം വന്നതാണ് ആന്റണി രാജുവിന്റെ 'ജെട്ടി കേസ്'.

ടി.പി. സെൻ കുമാർ ഐ.ജി. ആയിരുന്ന 2006 കാലത്ത്  പുനരന്വേഷണം നടത്താൻ അദ്ദേഹം ഉത്തരവിട്ട കേസ്‌ ആണ് ഈ 'ജെട്ടി കേസ്'. അതിൽ ആന്റണി രാജു പ്രതി ആയിരുന്നു.

സംഭവം എന്താണെന്ന് നോക്കണ്ടേ?  ആന്ദ്രു സാൽവഡോർ സെർവല്ലി എന്നൊരു ഒരു സായിപ്പിനെ 1990 ൽ ജെട്ടിയ്ക്കകത്ത്‌ ഒളിപ്പിച്ച്  മയക്കു മരുന്ന്    ( 61.5. ഗ്രാം ഹാഷിഷ്) കടത്തി എന്നാ കേസിൽ പിടിച്ചു. തൊണ്ടി മുതൽ ആ ജെട്ടി. ഡിസ്ട്രിക്റ്റ് മജിസ്ട്രേറ്റ് അങ്ങേരെ 10 വർഷം തടവിനു വിധിച്ചു. കേസ് ഹൈ ക്കോടതിയിൽ വന്നപ്പോൾ വന്നപ്പോൾ തൊണ്ടി യായ ജെട്ടി  ഒരു കൊച്ചു ജെട്ടി. കൊച്ചു കുട്ടികൾക്ക് മാത്രം ഇടാവുന്നത്. കേസ് തള്ളി. ( ഇത് പോലെ മോഹൻ  ലാലിന്റെ ഒരു സിനിമയിൽ ഉണ്ടായിരുന്നു എന്ന് തോന്നുന്നു. ഇതായിരിയ്ക്കും   അതിനു പ്രചോദനം ). സായിപ്പിനെ വെറുതെ വിട്ടു. 2002 ൽ തിരുവനന്തപുരം പോലീസ് കമ്മീഷണർ കേസ് എഴുതി തള്ളി. അതിനു ശേഷം ആണ് കേസ് തുറന്നതും പുനരന്വേഷണം നടത്തിയതും ആന്റണി രാജുവിനെ പ്രതിയാക്കിയതും.

കോടതിയിലെ ഒരു ക്ലാർക്കും പ്രതി. അയാള് പറഞ്ഞത് സൂക്ഷിയ്ക്കാൻ കോടതി ഏൽപ്പിച്ചിരുന്ന ജെട്ടി വക്കീൽ ആന്റണി രാജു വാങ്ങി എന്നും കുറെ ദിവസം കഴിഞ്ഞു തിരിച്ചു കൊടുത്തു എന്നും ആണ്. അതാണ്‌ ജെട്ടി കേസ്. 

അതിൽ  പ്രതിയായ രാജു ആന്റണി ആണ് ഈ ചാനലുകളിൽ വന്നിരുന്നു വാചകം അടിയ്ക്കുന്നത് എന്നാണ് ബിജു രമേശ്‌ പറഞ്ഞത്.

ബിജു ഓർമിപ്പിച്ചത് നന്നായി. ടി.പി. സെൻ കുമാർ ഇപ്പോൾ ഡി.ജി.പി. ആണ്.

ഒരു മാസിക

മെയ് മാസം പ്രസിദ്ധീകരണം ആരംഭിച്ച  സർഗഭാരതി മാസിക. 

വിഴിഞ്ഞം വീണ്ടും

25 വർഷമായി കേരള സർക്കാർ ആസൂത്രണം ചെയ്തു കൊണ്ടിരിയ്ക്കുന്ന ഒരു പദ്ധതി ആണ് വിഴിഞ്ഞം അന്താ രാഷ്ട്ര തുറമുഖം. സംഭവം ഇത് വരെ ഒന്നും നടന്നിട്ടില്ല. ഒരാൾ ടെണ്ടർ നൽകി എന്നതൊഴിച്ചാൽ.  ഇനി ഒരു 25 വർഷം കൂടി കഴിഞ്ഞാലും ഒന്നും സംഭവിയ്ക്കുകയില്ല എന്ന്എന്നും ഒരു നടക്കാത്ത മധുര സ്വപ്നമായി അവശേഷിയ്ക്കും എന്ന്  നമുക്ക് ഉറപ്പിയ്ക്കാം.

പുതിയ ടെണ്ടർ, അദാനി പോർട്സ് നൽകിയത്, അനുസരിച്ച് 

 മൊത്തം ചെലവ്-                                     7525 കോടി .

അതിൽ അദാനി മുടക്കുന്നത്                2454 കോടി

കേരള സർക്കാർ മുടക്കുന്നത്               4253 കോടി

കേന്ദ്ര സർക്കാർ                                            818 കോടി

ഇതാണ് കണക്ക്.

കോണ്‍ഗ്രസ്സിന് ആണെങ്കിൽ ഇത് ഇറങ്ങി പ്പോകുന്നതിനു മുൻപ് നടത്തിയെടുക്കണം എന്നാണു ആഗ്രഹം. അതിനായി അദാനിയിൽ നിന്നും കൈക്കൂലി വാങ്ങി എന്ന് മാർക്സിസ്റ്റ് കാര് പറയുന്നു. ഡെൽഹിയിൽ കെ.വി. തോമസിന്റെ വസതിയിൽ അദാനിയുമായി കണ്ട് കോഴ വാങ്ങി എന്നാണ് പറയുന്നത്. 

അതിനു മറ്റൊരു വേർഷൻ കൂടി പറയുന്നു. സത്യത്തിൽ ചാണ്ടിയ്ക്ക് ഇതിൽ താൽപര്യമില്ല. ഇതൊരു ഷോ ആണ്. തമിഴ് നാട്ടിൽ ചാണ്ടിയ്ക്കും ബാബുവിനും ( മദ്യ മന്ത്രി) കോടികളുടെ എസ്റ്റെറ്റ് ജയലളിത കൊടുത്തു കഴിഞ്ഞു. ഇത് പോയാൽ അവിടെ കൊളച്ചൽ  തുറമുഖം  വരുത്തും.  എങ്ങിനെയെങ്കിലും മാർക്സിസ്റ്റ് കാർ   ഒടക്കാൻ വേണ്ടിയാണ് ചാണ്ടി ഇരിയ്ക്കുന്നത് എന്ന്.

മാർക്സിസ്റ്റ് കാർ പറയുന്നത് ഇതിൽ സുതാര്യതയില്ല. സംസ്ഥാനം തീരെഴുതുന്നത് പോലെയാണ് എന്ന്. അത് മാത്രമല്ല. ഇത് രാജ്യ സുരക്ഷയ്ക്ക് ഭീഷണി ആണെന്നാണ്‌ യെച്ചൂരി പറയുന്നത്. പണ്ട് മാർക്സിസ്റ്റ് കേരളം ഭരിയ്ക്കുമ്പോൾ ഒരു ചൈനീസ് കമ്പനി വന്നപ്പോൾ കേന്ദ്രം ഭരിയ്ക്കുന്ന കോണ്‍ഗ്രസ്സ് പറഞ്ഞത് ഇതേ കാരണം. രാജ്യ സുരക്ഷാ ഭീഷണി.

രണ്ടു പേരും കൂടി ഇത് ഇല്ലാതാക്കും എന്നാണ് ബി.ജെ.പി. പറയുന്നത്. എങ്ങിനെയങ്കിലും ഇത് നടത്തി എടുക്കണം എന്ന് കേന്ദ്ര മന്ത്രി ഗദ്ക്കരി യും പറഞ്ഞു. അല്ലെങ്കിൽ തമിഴ് നാടിലെ കൊളച്ചലിൽ കൊടുക്കും എന്ന്.

ഇന്നത്തെ ഒരു വാർത്തയാണ് . സ്റേറ്റ് ലെവൽ ബാങ്കേർസ് കമ്മിറ്റി സമാഹരിച്ച വിവരങ്ങൾ അനുസരിച്ച് വിദേശ മലയാളികളുടെ കേരള ബാങ്കുകളിലെ 2014-15  വർഷത്തെ  നിക്ഷേപം 1.1  ലക്ഷം കോടി രൂപയാണ്. നൂറ്റി പത്തായിരം  കോടി രൂപ!  ഈ കോടിയിൽ നിന്നും വെറും  ഒരു 7000 കോടി രൂപ,  വെറും 6  ശതമാനം,  ഈ പ്രവാസികളിൽ നിന്നും നേരിട്ട്  വിഴിഞ്ഞത്തിന് വേണ്ടി സ്വരൂപിയ്ക്കാൻ നമ്മുടെ സർക്കാരിന് കഴിയില്ലേ? പാർട്ടിയ്ക്ക് പണം ഉണ്ടാക്കാൻ ഇടയ്ക്കിടെ ഈ മന്ത്രിമാരും രാഷ്ട്രീയ നേതാക്കളും  ഗൾഫ്സന്ദർശനത്തിന് പോകാറുണ്ടല്ലോ. 

ഇപ്പോൾ സർക്കാർ മുടക്കാൻ തുടങ്ങുന്ന  4253 കോടി യും പലിശയ്ക്കു എടുക്കുകയാണല്ലോ.അല്ലാതെ എന്തു ചെയ്യും ട്രെഷറി കാലിയാണല്ലോ.  ജപ്പാനിൽ നിന്നോ ADB, IMF ഇങ്ങിനെ എവിടെ നിന്നെങ്കിലും. കൊള്ള പ്പലിശയ്ക്ക്. പക്ഷെ 15 വർഷം കഴിഞ്ഞേ വിഴിഞ്ഞത്ത്  നിന്നും വരുമാനം എന്തെങ്കിലും   കിട്ടി ത്തുടങ്ങൂ. അത് വരെ ഈ പലിശ കൊടുത്ത് കൊണ്ടേ ഇരിയ്ക്കണം.  അതും കിട്ടുന്നതോ വരുമാനത്തിൻറെ 1 ശതമാനം.  പതിനാറാം വർഷം 2 ശതമാനം. അങ്ങിനെ പോകും.   പണി 2019 ൽ പൂർത്തിയാകും എന്നാണ് പറയുന്നത്. പിന്നെയും കാത്തിരിയ്ക്കണം പത്തു വർഷം   5 പൈസ എങ്കിലും കിട്ടാൻ. 

അതിലും കുറച്ചു പലിശ കൊടുത്താൽ മതിയല്ലോ പ്രവാസികൾക്ക്, ബാങ്ക് കൊടുക്കുന്ന പലിശ. അല്ലെങ്കിൽ ലാഭ വിഹിതം. അങ്ങിനെ ഏതെങ്കിലും രീതി.  അതും 15 വർഷം കാത്തിരിയ്ക്കാതെ പോർട്ട്‌ തുടങ്ങിയാൽ ( 4 വർഷം) ഉടൻ പണം വേണമെങ്കിൽ മടക്കി നൽകി തുടങ്ങുകയും  ചെയ്യാം.

മാഗി

അതെ. 30 വർഷമായി നമ്മളെ ചൂഷണം ചെയ്തു കൊണ്ടിരിയ്ക്കുന്നു.

എന്ത് കഴിയ്ക്കണം എന്നോ കഴിയ്ക്കുന്നതിൽ എന്തൊക്കെ ഉണ്ടോ എന്നൊന്നും നമ്മലളല്ല തീരുമാനിയ്ക്കുന്നത്. അത് വലിയ ഭക്ഷണ നിർമാണ കമ്പനികൾ ആണ്. നമ്മൾ കണ്ണും പൂട്ടി വിഴുങ്ങുന്നു. അവർ തരുന്നതും അവർ പറയുന്നതും.

2 മിനിട്ട് കൊണ്ട് ഒരു ലോകം നമ്മുടെ മുന്നിൽ തുറന്നു തരുന്നു എന്ന് തോന്നിപ്പിയ്ക്കുന്ന പരസ്യവുമായി ആണ് മാഗി നൂഡിൽസ് വന്നത്. ലോക  പട്ടിണിയ്ക്ക് ഒരു പരിഹാരം എന്ന നിലയിൽ.  ഇത്രയും നാൾ നമ്മൾ കാത്തിരുന്നത് അതാണ്‌ എന്ന മട്ടിൽ നമ്മൾ കൂട്ടത്തോടെ അത് വാങ്ങി കഴിച്ചു. പരസ്യം കണ്ടു പിള്ളേർക്ക് അത് ഒരു പൂർണ ആഹാരമായി നമ്മൾ നൽകി, കരുതി. നമ്മെളെ കഴിപ്പിയ്ക്കാൻ വന്നത് ആരെന്ന് നോക്കൂ. അമിതാഭ് ബച്ചൻ, മാധുരി ദീക്ഷിത്, പ്രീതി സിന്റ തുടങ്ങിയവർ. വളരെ നല്ലതാണ്, ആരോഗ്യത്തിന് അത്യുത്തമം എന്നൊക്കെ പറഞ്ഞു ഇവർ വന്നപ്പോൾ നമ്മൾ കൂടുതൽ വാരി ക്കഴിയ്ക്കാൻ തുടങ്ങി.

ഇപ്പോഴിതാ പറയുന്നു അതിൽ  ഈയം അമിതമായി അടങ്ങിയിട്ടുണ്ട്. പിന്നെ മാരകമായ ചൈനീസ് സാൾട്ട് (MSG) ഉണ്ടെന്ന്.  പല സംസ്ഥാനങ്ങളിലും അത് നിരോധിച്ചു കഴിഞ്ഞു. അമിതാഭ് തുടങ്ങിയുള്ളവരുടെ പേരില് കേസും എടുത്തു തുടങ്ങി.  അത് വളരെ ആവശ്യമാണ്‌. ഇതെന്താണ് എന്ന് അറിയാതെ കാശും വാങ്ങി ഇത് നല്ലതാണ് കഴിയ്ക്കൂ എന്ന് നമ്മോടു പറഞ്ഞു നമ്മളെ വഞ്ചിയ്ക്കുന്ന  ഇവർക്കെതിരെ കേസ് എടുക്കുക തന്നെ വേണം.

നെസ് ലെ എന്നത് ഒരു വലിയ ആഗോള ഭീമൻ ആണ്. അവർ ശത കോടികൾ ഉണ്ടാക്കുന്നത്‌ ഈത്തരം തട്ടിപ്പ് കൊണ്ടാണ്. തൽക്കാലം അവർ ഒന്ന് പിൻവാങ്ങിയേക്കാം. എങ്ങിനെയെങ്കിലും അവർ തിരിച്ചു വരും. വീണ്ടും നമ്മളെ വഞ്ചിച്ച്. കാഡ്ബറിയുടെ കഥ മറന്നു കാണില്ലല്ലോ. അവരുടെ ഡയറി മിൽക്ക് ചോക്കലെട്ടിൽ പുഴു കണ്ടു. അങ്ങിനെ വിൽപ്പന ഇടിഞ്ഞു. അവർ നേരെ അമിതാഭ് ബച്ചനെ കൊണ്ട് വന്നു. ഒരു പ്രശ്നവും ഇല്ല വാങ്ങി കഴിച്ചോ എന്ന് പുള്ളി ടി.വി.യിലൂടെയും മറ്റു പരസ്യങ്ങളിലൂടെയും നമ്മളോട് പറഞ്ഞു. ഇന്ന് എത്ര പേർ പുഴു കണ്ടത് ഓർമിയ്ക്കുന്നു? നമ്മൾ സന്തോഷമായി  ഡയറി മിൽക്ക് വാങ്ങി കഴിയ്ക്കുന്നു. അവരുടെ വിൽപ്പന പൂർവാധികം ഭംഗിയായി നടക്കുന്നു. അത് പോലെ ഒന്ന് രണ്ടു മാസം കഴിയുമ്പോൾ നമ്മൾ വീണ്ടും മാഗി നൂഡിൽസ് വാങ്ങി തിന്നു തുടങ്ങും.

ഈ ആഗോള ഭീകരർ എന്തൊക്കെയാണ് ഇതിൽ ചേർക്കുന്നത് എന്ന് പോലും നമ്മുടെ സർക്കാരിനോട് പോലും പറയില്ല. അത്ര ധാർഷ്ട്യവും പണക്കൊഴുപ്പും ആണവർക്ക്. നമ്മുടെ സർക്കാരുകൾ ആകട്ടെ കിട്ടുന്ന നക്കാപ്പിച്ചയും വാങ്ങി അത് സമ്മതിച്ചു കൊടുക്കും. അതിനെതിരെ ശക്തമായ നടപടി എടുത്ത ഒരേ ഒരു സർക്കാരെ ഉള്ളൂ. 1977 ലെ ജനതാ സർക്കാർ. കൊക്കാ കോള അമേരിക്കയിൽ നിന്നും കൊണ്ട് വരുന്നു എന്തോ ഒരു പൊടി കലക്കി നമുക്ക് തരുന്നു. എന്താണ് അതിനുള്ളിൽ എന്ന് അവർ  പറയില്ല. അന്നത്തെ സർക്കാർ    ( ജോർജ്  ഫെർണാണ്ടസ്) കൊക്കാ കോളയെ ഭാരതത്തിൽ നിന്നും പുറത്താക്കി. കുറെ വർഷം കഴിഞ്ഞാണ് അവനു തിരിച്ചു വരാൻ കഴിഞ്ഞത്. അത് പോലെ പ്രവർത്തിയ്ക്കുന്ന ഒരു സർക്കാർ ഉണ്ടെങ്കിലെ ഈ ചൂഷണത്തിൽ നിന്നും നമ്മൾ രക്ഷ പ്പെടൂ.

പിന്നെ നമ്മുടെ കയ്യിലും ഉണ്ട് കുറ്റം. നാട്ടിലുള്ള നല്ല സാധനം ഒന്നും കഴിയ്ക്കില്ല. വിദേശി എന്ത് junk  കൊണ്ടിറക്കിയാലും നമ്മൾ വാരി തിന്നും.ഇവിടത്തെ പൊരിച്ച കോഴി തിന്നു കൊണ്ടിരുന്ന നമ്മൾ ഒരു സുപ്രഭാതത്തിൽ KFC യുടെ അളിഞ്ഞ സാധനം വാങ്ങി തിന്നു തുടങ്ങി. അത് പോലെ ഡോമിനോസും പിറ്റ്സാ ഹട്ടും ഒക്കെ വന്നിറങ്ങി. സ്വർഗംകിട്ടിയത് പോലെ എന്താണെന്ന് അറിയാതെ നമ്മൾ തീറ്റ തുടങ്ങി. പിന്നെ ഒരു സഹായം അവർ ചെയ്യുന്നു.. നമുക്ക് ആവശ്യമായ മരുന്നും ഈ അമേരിക്കക്കാരും ഫ്രഞ്ച് കാരും  ഒക്കെ ഉണ്ടാക്കി തരുന്നുണ്ട്. 

പോലീസ്

പണ്ടത്തെ പോലീസ് ഏമാന്മാരെ ഓർമയില്ലേ? കപ്പടാ മീശ.ചുവന്ന കണ്ണുകൾ. പിന്നെ ഒരു കുടവയറും. അന്ന് നിക്കറാ വേഷം. മിയ്ക്കവാറും എല്ലാ പോലീസ് കാർക്കും കുടവയറു കാണും. ആദ്യം പോലീസിൽ ചേരുമ്പോഴുള്ള ശരീര ഫിറ്റ്നസ്സ് മാത്രമേ ഉള്ളൂ. പിന്നെ എല്ലാം ഇത് പോലെ തടിച്ചു കോലം കെട്ട രൂപങ്ങൾ ആയിരിയ്ക്കും.

കാലം മാറി. കോലം അത് പോലെ തന്നെ. ആ അര നിക്കർ  മാറി പാൻറ് ആയി.   ( തേയ്ച്ചു  വടി  പോലെ ആക്കിയ ലൂസ്  നിക്കറും  ഇട്ട് ഉയരമുള്ള ട്രാഫിക് ഐലൻഡിന് മുകളിൽ നിന്ന് ട്രാഫിക് നിയന്ത്രിയ്ക്കുന്ന പോലീസുകാരുടെ താഴെ നിന്നുള്ള കാഴ്ച്ചയെ പറ്റി ആക്ഷേപിയ്ക്കാരുണ്ടായിരുന്നു) തൊപ്പി മാറി. അത്ര തന്നെ. ബാക്കിയൊക്കെ പഴയത് പോലെ. സ്റെഷനിലെ പോലീസ് ഷേപ്പിൽ പഴയത് തന്നെ. എക്സർസൈസ് ഒന്നും ഇല്ല. മിയ്ക്കവാറും വെള്ളം. തടി വന്നിങ്ങു കേറും. വയറും ചാടും. മീശ മാത്രം കുറഞ്ഞു. ആകെ ശരീരം അൽപ്പം ഷേപ്പിൽ ഉള്ളത് SAP കാരാണ്. ബാക്കിയൊക്കെ തഥൈവ. ദിവസവും  എക്സർസൈസ് വേണം എന്നൊക്കെ നിയമം പറയുന്നു. ആര് കേൾക്കാൻ ആര് ചെയ്യാൻ.?

മേളിലോട്ടുള്ള ഏമാന്മാരുടെ കാര്യവും ഇതൊക്കെ തന്നെ. മൂത്ത് മൂത്ത് എസ്. പി.  ആകുന്നവർ ഇങ്ങിനെയൊക്കെ ആണ്. തടിയും കുട വയറും. പിന്നെ കുറെ ഐ.പി.എസ്. കാരാണ്. പിള്ളാര് കയറുമ്പോൾ നല്ല ശരീരം. പോലീസ് അല്ലെ. കുറെ മൂക്കുമ്പോൾ, ഒരു ഐ.ജി. ഒക്കെ ആകുമ്പോഴേയ്ക്കും  മിയ്ക്കവാറും സാദാ പോലീസ് മാരെ പ്പോലെ ഷേപ്പ് ഒക്കെ പോയി ഒരു പരുവം ആകും.  

ഈ ആർമി ആപ്പീസറന്മാരെ പ്പോലെ ഇവർക്കും എന്ത് കൊണ്ട് ഫിറ്റ്‌ ( മറ്റേ ഫിറ്റ്‌ അല്ല. അത് എന്നും ആകുന്നുണ്ട്) ആയി ഇരുന്നു കൂടാ. ഓരോ പ്രൊമോഷനും ആളിനെ കണ്ട് നോക്കി, വൈദ്യ പരിശോധനയും ഒക്കെ കഴിഞ്ഞ് സെലക്ഷൻ ആക്കിയാലെന്താ? അതെങ്ങിനാ . കാക്ക പിടുത്തവും കാലു പിടിത്തവും ഒക്കെ ആണല്ലോ ആ ഡിപ്പാർറ്റ്മെന്റിൽ. ഇപ്പോൾ തന്നെ കണ്ടില്ലേ. സിന്ഗ്ല ആണ് സീനിയർ. അങ്ങേര് കേന്ദ്ര ഡപ്യുട്ടേഷനിൽ നിന്നും വരുന്നു എന്ന് പറഞ്ഞു. മുഖ്യ മന്ത്രി പറഞ്ഞു വേണ്ട. ഇവിടെയുള്ള ആളെ ഡി.ജി.പി. ആക്കണം. ഒരു കണക്കിൽ   അതും ശരിയാ. നല്ല സമയം മുഴുവൻ നല്ല കേന്ദ്ര പദവികൾ   ഡപ്യുട്ടേഷനിൽ പോയി ആസ്വദിയ്ക്കും. ഇവിടെ ടോപ്പിൽ എത്താറാകുമ്പോൾ വരും. ഇതിനു ഒരു മറു വശവും കൂടിയുണ്ട്. ഇവിടെ മന്ത്രിമാരുടെയും രാഷ്ട്രീയക്കാരുടെയും  മൂട് താങ്ങി നിൽക്കാൻ മടിയുള്ള ഉദ്യോഗസ്ഥർ ഡപ്യുട്ടേഷൻ വാങ്ങി സ്ഥലം വിടും.

വാലറ്റം :  ഇനി വാഹന പരിശോധന യ്ക്ക് നിൽക്കുന്ന  പോലീസ് കാർ സാറേ, മാഡം എന്നൊക്കെ മാത്രമേ നമ്മളെ വിളിയ്ക്കൂ എന്ന് പുതിയ ഡി.ജി.പി. സെൻകുമാർ ഉത്തരവ് ഇറക്കി.

ചില സാമ്പിൾസ്‌.

" ലൈസൻസ് കാണിയ്ക്കെടാ സാറേ"
 "തലയിൽ വയ്ക്കാതെ ഹെൽമെറ്റ്‌ കാലിന്റെ ഇടയിൽ വച്ചിട്ട്   ആണോടാ മൈ സാറേ പോകുന്നത്?"
"മര്യാദയ്ക്ക് കാശ് കൊടുത്തിട്ട് പോടീ  മാഡം"